12/11/2014 10:07:38

Cana për mediat franceze: do të luajmë miqësore luksi

Kombëtarja po përgatitet për sfidat e radhës miqësore ndaj Francës dhe Italisë, ndeshje që luhen respektivisht më 14 dhe 18 tetor, teksa gjendja e ekipit është e mirë dhe lojtarët në tërësi ndihen në formë

HermesNews - Vetë trajneri De Biazi po udhëheq përgatitjet m,e shpresën e një rezultati pozitiv në të dy takimet, në një kohë që lojtarët kërkojnë performancën më të mirë në këto dy ndeshje sepse janë nën vëzhgimin e menaxherëve të klubeve të njohura franceze e italiane.

Një lojtar që ndihet i emocionuar nga këto dy miqësore është padyshim Lorik Cana, që ka luajtur në të dy vendet dhe njeh mjaft mirë dhe gjuhët përkatëse. Për Canën do të jenë përplasje luksi për një ekip në ngjitje si Shqipëria, pa harruar të shkuarën e tij fantastike me PSG dhe Marsejën, dy skuadrat më të njohura në Francë. Cana mbetet lojtari më popullor i Kombëtares dhe njihet edhe nga mediat e njohura sportive të kontinentit si lojtari shqiptar që ka një karrierë të pasur në disa prej klubeve të njohura. Sidomos në Francë futbollisti me origjinë kosovare ka njohje të vjetra dhe merret shpesh në intervista.

Qëndrimi për mediat franceze

Lorik Cana është personazhi më i njohur i përfaqësueses kuqezi për opinionin sportiv francez, pasi në karrierën e tij futbollistike ka spikatur pikërisht në Francë fillimisht me Paris Saint Germain e më pas te Marsejë. Në prag të miqësore me kombëtaren e Gjelave në stadiumin e Renes, mediat franceze sjellin prononcimin e kapitenit kuqezi për këtë përballje luksi, sikurse është edhe sfida e 18 nëntorit me Italinë. Sipas Canës, Franca mbetet një skuadër e madhe dhe vjen pas një periudhë pozitive në Brazil 2014. Ajo do të jetë favoritja kryesore për të triumfuar në Euro 2016 edhe për faktin se luan në shtëpinë e saj.

Cana shprehet se Shqipëria nuk është mësuar të luaj me të tillë kundërshtarë në sfidat miqësore, ku përfshin edhe 90-minutëshin me Italinë 4 ditë përballjes me formacionin e Didier Deshamp, prandaj i quan dy ndeshje prestigji për kuqezinjtë e De Biazit. Për lidhjen e veçantë që ka me qytetin e Marsejës, 30-vjeçari shprehet se do të dëshironte që Francë – Shqipëri të luhej në Velodrome. Për herë të fundit Shqipëria ka qenë në të njëjtin Grup me Francën në eliminatoret e Euro 2012, ku më emocionues ishte takimi i “Qemal Stafës” më 2 shtator të 2011, që përfundoi me fitoren 2-1 të skuadrës së Laurent Blank. Cana shprehet se Shqipëria e vuri në vështirësi serioze Francën, por u ndëshkua nga dy gola të thjeshtë që në fund u dhanë tri pikëve kundërshtarëve. Në fund kapiteni kuqezi kujton se në këtë miqësore do të thyejë rekordin e futbollistit me më shumë ndeshje me kombëtaren, të cilin aktualisht e ndan me Altin Lalën me 79 prezenca në përfaqësuese.

Arbër Meçenovi

Dërgo me email | Stampo artikullin